什麼活動才會男女平衡 (三)

上一篇講到搞手點控制男女比例 (前文回顧:https://nakama.club/什麼活動才會男女平衡-二/),但係其實一直漏咗一個重點冇討論到:就係由女士嘅視覺睇,究竟一個活動點樣先值得去!搞手點控制男女比例只係手段,要治標又治本就先要解讀女士究竟點解會去一個活動!

好彩Nakama係一個專業嘅活動平台,我哋有完整嘅數據庫研究唔同人希望參加一個點樣嘅活動!跟據過往半年嘅問卷調查紀錄,有69%嘅女仔會留意活動嘅性質,50%嘅女仔會在意活動價錢,42.3%嘅女仔會考慮活動嘅創新性。以上呢3個數值男仔同女仔出入唔大,所以唔能夠作為預測活動男女比例嘅決定性因素。而上一篇文講過,35.7%嘅男仔會考慮參加者男女比例,而會考慮同一樣野嘅女仔就只有11.5%;所以話俾一個女仔聽女仔多都未必吸引得到佢去一個活動。

然後,重點黎喇 —— 針對「是否認識其他參加者」呢個因素,只有16.7%嘅男仔會考慮,但係就有42.3%嘅女仔會考慮;而「其他參加者質素」呢個因素,男女重視嘅比例亦出現明顯差距!一句講曬,就係女仔要去嘅係一個「有自己識嘅朋友」或者有「高質素嘅朋友」嘅活動!睇到呢度我知道一定有好多女讀者睇到點曬頭,唔好諗啦快啲將呢一篇Blog分享出去!你嘅一次分享可以幫到無數隻迷途嘅小羔羊,好人一生平安呀!

(被撃飛) (重重著地) 唔好意思high大左,可能有人覺得呢個係一件理所當然嘅事,但其實係一個好多人忽略左嘅重點,可以直接或間接利用黎改進活動嘅男女比例。首先如果要「有自己識嘅朋友」,首當其衝都係要睇返搞手係一個點嘅人;如果搞手係一個Bitch或者一個一睇就知無朋友嘅毒毒,你都唔好預期會有好多女仔當佢係朋友而去佢嘅活動喇… 好彩Nakama入邊有好多WhatsApp群俾大家互通消息,想知一個搞手係咪伏只要係群入邊一問就知。當然,就算個搞手好伏,只要活動制度上有「二人同行,八折收費」或者「女生特惠」之類嘅安排,都仲有機會扳回一城嘅。

然後,更大嘅重點黎喇:「其他參加者質素」!雖然係調查結果黎睇女仔重視「活動創新性」嘅程度同重視「其他參加者質素」嘅程度差不多,但因為問卷調查係記名嘅所以唔排除部分女仔尷尬唔敢話自己重視參加者質素而出現調查誤差 —— 男仔都唔好意思講話黎個活動係因為有靚女啦?所以甚至可以預期女仔重視參加者質素遠高於活動性質。姐係話,如果一個搞手強調自己會有「高質男生」出席佢嘅聚會,男女比例就會更趨平衡!具體點做?例如我話「中環高級酒吧,紅白Champagne女士任飲」相信對女仔係有吸引力嘅,但如果我話「中環酒吧,搞手律師行出身,全場律師醫生朋友」。你話喇,你係女仔你去邊個?

所以除左Your Face Your Fate,都唔好唔記得Your Pay Your Fate。合理架喎,男仔黎識白富美,點解女仔唔可以黎識高富帥?只不過女仔比較重質不重量姐。咁當然如果你好似上邊咁直白話「全場律師醫生朋友」就太坦白喇,但如果間接地話「男參加者By Invitation Only」、場地係「某某高級酒吧 / 某某私人屋苑會所」、飲食係「酒店級到會包生蠔」,聯絡人係「律師Calvin」,個event description又加兩句English入去,再加多張成班健身教練西裝友嘅相話係上次活動影嘅,成件事係咪即刻High Class左呢?

但老老豆豆,就算俾你去到一個男女平衡嘅活動,你受唔受參加者歡迎都係另一件事;如果你係一個成身汗味,講野甩甩cut cut又唔敢望人嘅小毒毒,就算個活動女多男少你都係One Night Stand得個睇字嘅姐。所以與其過份執著係咪男女平衡,不如先提升自身質素成為一個女仔眼中高質嘅人,咁無論係咪場合你強大嘅氣場都能夠吸引到女士嘅目光啦!不過… 到底點樣嘅男仔先係「高質」?係咪一定要醫生律師?no No NO!如果同學你咁諗就太天真喇,根據我地多年嘅活動經驗呢啲頭銜嘅野只係錦上添花!真正重要嘅係咩?下一篇文「如何成為異性眼中高質的存在」話你知!

非常歡迎大家投稿啊!只要係關於活動同交友嘅文章都有可能會刊登出嚟同咁多位朋友分享。你又有咩心得?快啲話俾大家聽啦!另外如果想加入超過40個唔同嘅WhatsApp Groups結識志同道合嘅朋友,又或者想出席每月20幾個唔同嘅活動,就快啲下載我地嘅專用App,登記加入Nakama啦:https://nakama-group.com/nakama-app/

By Nakama管理員

Leave a Comment