無論係出去識朋友定係同異性溝通，最怕既往往係搵唔到共同話題。我鐘意踢波睇波，佢鍾意煲韓劇，兩個好似真係冇共同話題。呢個時候，又會有人同你講：不如試下同佢傾食野喇，人人都鐘意食野都要食野。「你有冇食過呢間啊？」「我有啊，幾好食啊，我鍾意食佢個甜品。」「我都係啊。」咁… 跟住呢？跟住你發覺又要搵另外一間餐廳去講，講多幾句，又停左……
其實，「話題」呢樣野，可以增進到你同其他人既溝通，但某程度上，亦會限制左同其他人既溝通，因為我地每一個人都對「共同話題」呢樣野太趨之若騖。到底呢樣野係米又真係咁神奇?
係答呢樣野之前，不如回歸基本步，諗下點解會同其他人傾計。係因為想透過傾計了解佢多D？定係只不過想搵個人同你用傾計去填補一段所謂既「社交時間」，因為唔同人傾計會好似好悶咁。如果係前者，我強烈建議你繼續睇落去，如果係後者…，都可以睇落去。
其實係你覺得「冇共同話題」之前，不如諗下你有冇去了解過同你傾計個人？你鍾意踢波睇波，你會期望搵到一個鍾意同你講波既人，傾到「天花龍鳳」；而人地鍾意煲韓劇，其實都好想同你傾下「The King」既劇情。點解大家唔可以先放低自己最熟既話題，去聽對方講佢鍾意既話題呢？當傾完之後，你先真真正正聽到對方鐘意D咩，同埋點解鍾意。我地要了解一個人，唔係要了解有咩共同話題可以令我地不停咁傾落去。話題只係一個工具比你去更了解你面前既呢一個人。
溝通好重要既一個部份係聆聽，當你心急要表達自己對某樣野既熟悉程度，例如你好想話比佢聽你睇到伊巴謙莫域有幾好波之餘，佢都好想話你聽到底李敏鎬係「The King」入面有幾型幾靚仔。一個願意聽你分享你鍾意D咩既人，唔係更加值得同佢做朋友咩？到底係想同佢搵到可以一路傾落去既人，定係透過話題發現大家諗法上既共通點呢？
無論係咩類型既溝通，都一定包括聆聽，當你都冇聆聽人地鍾意D咩，想講D咩，咁你又點解要求人地聽你分享番你鍾意既野呢？了解多D佢既興趣，了解多D佢既諗法，即使佢既諗法同興趣同你差天動地，你一樣會發現大家都會有共通點，而呢一D共通點遠遠會比一個所謂既共同話題更值得延續落去。
共同話題係好重要，但係亦都唔好忽視聆聽，了解既重要性，呢D野先會令到你地溝通到，了解到對方。如果你唔想同一個人傾左成個晏就都未了解到佢鐘意D咩，不仿多D聆聽，多D去問多D聽多D佢鍾意既野。我相信，呢樣野好少人會覺得反感，每一個人都希望有人聽到佢既感受。
打呢篇文章既時候，我同時籌備緊後生仔女傾下計2.0活動，好多人問我到底個活動想做D咩？想帶出D乜野Message？睇完呢篇你就會明，活動除左係活動，仲可以有野落袋，呢個就係我做搞手想做到既野。
非常歡迎大家投稿啊！只要係關於活動同交友嘅文章都有可能會刊登出嚟同咁多位朋友分享。你又有咩心得？快啲話俾大家聽啦！另外如果想加入超過40個唔同嘅WhatsApp Groups結識志同道合嘅朋友，又或者想出席每月20幾個唔同嘅活動，就快啲下載我地嘅專用App，登記加入Nakama啦：https://nakama-group.com/nakama-app/！
By Nakama管理員
