如何成為異性眼中高質的存在 (二)

上次就講到如果要吸引女仔最重要嘅係要畀到「快樂」佢,咁到底女仔點樣先會快樂呢?我本來又想再出啲調查數據畀大家,但係結果發現一個大問題:女仔口講嘅同實際出現嘅情況有太大分別… 就好似上一篇咁講,女仔好多都唔知自己想要嘅其實係咩人。男仔就簡單得多呢,樣佔6成,剩低4成,睇身材 (笑)。

所以我決定間接參考另一個數據庫,呢個數據庫可以間接反映出女仔需要邊一種嘅「快樂」,而且Sample Size係數以億計!呢個數據庫就係:愛情電影!當然要參考嘅係女仔鍾意嘅愛情電影唔係男仔鍾意嘅,即係唔係嗰啲粗壯嘅男人瘋狂抽打對手,或者係有錢靚仔嘅男人射到周圍都係;我講緊嘅係Avengers。

咁有啲咩係人盡皆知,受女性歡迎嘅電影?「格雷的五十道陰影」一定係其中之一,而佢簡直係突破左近代對女性嘅既有觀念;原來女仔反而鍾意睇呢一種性變態電影!唔通女仔真係鍾意呢種變態嘅「快樂」?

係下定論之前我哋可以將佢同經典嘅、受女性歡迎嘅愛情電影「鐵達尼號」對比一下。如果考慮呢兩套電影男主角嘅共通點,你幾乎完全搵唔到 – 除咗靚仔之外。一個好有錢,一個好窮。一個好年輕,一個成熟穩重事業有成。一個喺套戲裏面性行為正常,一個喺套戲裏面性行為變態。咁點解兩套戲嘅男主角都咁觸動女人心呢?深入研究之後就會發現佢兩個係有一個共通點:刺激、危險!

我諗過好多其他嘅詞匯形容呢個共通點,例如新鮮感?但如果嗰種新鮮唔係女仔鍾意嘅,其實一啲意義都冇;不羈? 呢個詞好似好型咁,但係實在太抽象好難好好咁解釋。所以思前想後之後我發覺最適合嘅係「有危險感嘅刺激」呢個描述。 呢個描述嘅相反就係「老實」,而每次當一個男仔被形容為老實基本上你可以當佢已經收到好人卡。

刺激感本來就對人類有一種無法抗拒嘅吸引力,過山車鬼屋笨豬跳全部都係為左可以喺安全範圍內畀刺激感玩家。同樣道理,如果一個男人可以畀到異性呢種有危險感嘅刺激,對異性嚟講都會有致命嘅吸引力,亦姐係一啲都唔「悶」。格雷sell嘅唔係霸道總裁有幾有錢,而係有幾分危險嘅性刺激;鐵達尼號sell嘅唔係係郵輪拍拖有幾浪漫,而係窮小子係有錢女眼中獨有嘅危險刺激感。

要舉例子嘅話仲有無限多,近期啲嘅有「la la land」, 男人追逐夢想唔知會唔會成功嘅刺激感 ;「我的少女時代」, 男主角就係一個爛仔,全身都係危險嘅氣息;最經典嘅一定係「Beauty and the Beast」啦,主角直頭唔係人呀!淨係諗起都覺得刺激。

但係係咪淨係有刺激感女仔就一定會覺得「快樂」呢?又唔係嘅,刺激感始終只係短期嘅快樂,就好似笨豬跳如果跳足10個鐘都應該快樂極有限啦。長遠嚟講都要睇埋其他要素,呢個時候安全感呀生活保障呀嗰啲先會開始出黎。我觀察下覺得雙方單獨相處嘅頭嗰6個小時係刺激感最有殺傷力嘅時候,因為互相對對方嘅了解都未係好深仲充滿神秘感,而且好多野都未同對方做過。呢6小時可能係一日過曬可能係分開好幾次唔同嘅約會感受到,總之就係呢6個鐘會沖昏咗女性嘅頭腦,令佢哋將安全感呀生活保障呀通通放埋一邊,享受一場安全嘅冒險!

咁到底相處嘅頭呢6個鐘應該點樣將自己包裝成一個危險又刺激嘅高質男性呢?蝙蝠有限,下一篇「如何成為異性眼中高質的存在 (三)」 再同大家拆解!

非常歡迎大家投稿啊!只要係關於活動同交友嘅文章都有可能會刊登出嚟同咁多位朋友分享。你又有咩心得?快啲話俾大家聽啦!另外如果想加入超過100個唔同嘅WhatsApp Groups結識志同道合嘅朋友,又或者想出席每月100幾個唔同嘅活動,就快啲下載我地嘅專用App,登記加入Nakama啦!

By Nakama管理員

下載NAKAMA及聯絡我們

* 登記加入視為同意我們的免責條款隱私權保護政策

Leave a Comment