管理員搞左咁耐活動自然識好多專業人士朋友，可能大家會覺得佢地肯定坐係度都有女飛撲過黎，但我以下要講嘅都係真人真事：律師A，90後月入過5萬，佢係Nakama活動入邊前前後後追過3個女仔，每次都精心安排出盡法寶，每個約會都精挑細選，但結果？第1個係曖昧期就俾第二條仔搶左，第2個拍左拖唔夠1個月就飛左佢，追到第3個女仔先搵到真愛。會計師B，同樣90後月入過5萬，又係Nakama活動入邊前前後後追過2~3個女仔，管理員知道最少1個無揀佢，而最後初戀就俾左個MK妹，仲要拍拖拍到而家俾人迫婚做「埋單男」。
佢地係咪衰外表？管理員覺得論外貌佢地無7分都有6分，肯定唔係主要問題。無不良嗜好唔煙唔酒唔蒲，而且就算想蒲都無得蒲啦日日放工都9點幾10點，加上亮眼嘅高收入，客觀因素上一定係無可挑剔嘅7~8分筍盤；如果同樣客觀分數嘅女仔，肯定收兵收滿成個香港大球場！但點解佢地都唔能夠係情場上傲視眾生，叱吒風雲呢？
為左解答呢個問題，管理員嘗試問左好多女仔到底點解會出現咁嘅現象。可惜，當你問一個女仔點樣先會鍾意一個男仔嘅時候，絕大多數女仔都唔會俾到任何值得參考嘅答案你…… 而其中最唔值得參考嘅答案就係：睇Feel囉！我X你XXXXX，咁姐係點呀？你起碼都話我知你用咩黎Feel呀？如果用眼咁我明呀，姐係Feel到佢靚仔啲囉，咁我樣衰我輸得心甘命抵，但…… 你地偏偏又要話你唔係好睇樣？咁唔通係用耳仔黎Feel？姐係個男仔把聲好聽啲就嬴面大啲？但歌仔都有得你唱啦，「給你賣力唱二十首真心真意，米高峰都因我動容……」又唔見你動容吓？咁到底到底到底，咩係Feel呀？
終於，管理員諗左好耐，綜合左好多人嘅意見，仲參考左好多溝女心理學嘅書籍，總算得出一個相對合理而受大眾（主要係女性）接受嘅理由，呢個理由簡單黎講可以整合成一個字：悶！
人做好多野其實都只係為左「快樂」。去旅行、食好食嘅野、住靚嘅屋，全部都係為左令自己開心，令自己更快樂。而以上列舉嘅例子全部不外乎一個共通點，就係要錢！有人話錢買唔到快樂，但的確無錢真係一啲都唔快樂，所以有錢嘅男士有條件俾到更多嘅「快樂」佢嘅伴侶，變左一件好似好順理成章嘅事；但事實係咪咁樣呢？
如果可以去旅行，但係要同一個同你無話題嘅人去；
如果去食好野，但係要陪一個同你無計傾嘅人食；
如果住靚屋，但係要同一個悶到發毛嘅人一齊住；
咁我諗呢份快樂，點都會大打折扣喇。
可惜嘅係，為左要成為專業人士，大部分嘅醫生律師會計師都將佢地大部分青春奉獻左俾佢地嘅專業，所以都係典型嘅悶蛋，或者毫無情趣嘅異性絕緣體。更大件事嘅係，因為佢地深知賺錢辛苦，所以係駛錢上好多時更加就住就住，甚至可以用孤寒黎形容！連你最大嘅優勢 – 多金 – 你都要收埋佢，你仲點令到我地嘅港女們「快樂」？
咁相反，除左錢之外有啲咩可以帶到「快樂」俾女仔呢？…… 唔好諗衰野呀你班咸濕仔，女仔要嘅快樂唔係你班友左青龍右滑鼠果種快樂，而係更高要求、更麻L煩嘅快樂。下一篇「如何成為異性眼中高質的存在 (二)」，同大家繼續深入淺出咁探討點樣取悅你心儀嘅對象，一齊尋求極致嘅快樂奧秘！
…… 真係好似講緊咸濕野咁。
非常歡迎大家投稿啊！只要係關於活動同交友嘅文章都有可能會刊登出嚟同咁多位朋友分享。你又有咩心得？快啲話俾大家聽啦！另外如果想加入超過100個唔同嘅WhatsApp Groups結識志同道合嘅朋友，又或者想出席每月100幾個唔同嘅活動，就快啲下載我地嘅專用App，登記加入Nakama啦！
By Nakama管理員
