什麼活動才會男女平衡 (二)

上次講到點解出活動男多女少是常態 (前文回顧:https://nakama.club/什麼活動才會男女平衡-一/),咁到底點先可以搵到男女比例平衡嘅活動呢?係呢度先唔提自私搞唔公開宣傳嘅活動,如果係一個搞手好有心逐個逐個約咁梗係女多男少都得啦,但佢約唔約得到你… 就真係Your Face Your Fate喇。

咁萬一你真係無人脈無經驗,出活動又唔想撞正「棍聚」,咁… 點算呢?

首先我第一句要講嘅係:你一定會唔小心撞到棍聚!一定會!我以前都去唔少 T_T 但經驗就係要累積嘅,到你去得幾次可能就會發現:其實男仔先係你杯茶 有啲活動係男仔之間玩會開心啲。例如桌遊聚,如果係一啲玩成個鐘嘅燒腦game,你撘個唔知自己係度做咩嘅迷糊星人係度真係會燥左。

又例如… 無例如喇,唔好自我安慰喇事實就係大部分活動只係得仔真係會GG。但係如果你真係去到一個棍聚,與其怨天怨地怨空虛,倒不如好好享受下順便同啲搞手熟下啦,話唔定佢地下次有高質嘅活動會叫埋你呢。搞手其實都在意參加者質素,如果佢覺得你係一個好嘅參加者,下次比較養眼嘅活動佢地都會優先問左你先,咁就唔再怕去錯活動喇。

咁到你慢慢累積左經驗,你大概就可以由活動性質同負責搞手等等活動細節中睇得出,一個活動會唔會男女失衡。例如,同上邊同一個例子,桌遊聚,如果搞手無刻意安排嘅話男女比例一般會去到3:1甚至5:1,無他嘅鍾意玩Board Game嘅女仔真係少。而如果係一啲唱K酒聚之類比較吸引到女仔嘅活動,比例就可以係2:1至3:1之間徘徊。而係Nakama入邊,有啲搞手會講到明自己重視男女比例,咁如果你趕得切報呢啲活動你就好有機會可以參加男女比例1.5:1甚至1:1嘅活動喇。

咁我地搞手係點令到男女比例接近1:1呢?其實不外乎幾個方法嘅姐:
1. 設男女人數上限,人數一夠就cut,限制男參加者人數。所以如果要避免俾人cut而參加唔到某啲活動,要報名就要快喇。
2. 女仔收費平過男仔,當女仔睇到自己收費平過男仔時無形中會有「抵左」嘅心態,咁正正都滿足左上一篇文章提及嘅女仔「要等男仔追」嘅心態,女仔都會比較有興趣參加呢啲活動。
3. 搞手主動PM女仔黎參加,咁就好睇搞手本身個人形象同人脈喇。但要留意嘅係搞手都係人,call人黎時都會有私心,所以如果你想佢PM女仔嘅同時會PM埋你~ 就請你好似前邊咁講,係不幸遇到棍聚嘅時候趁機同搞手熟下啦。

講左咁耐,我講到好似得男仔care男女比例咁;喂咁真係架喎,跟據我地Nakama嘅問卷調查,有38%嘅男仔係參加一個活動嘅時候都會重視男女比例,有5%嘅男仔甚至直接話呢個係唯一考慮點。而相對黎講,女仔就只有18%左右係會留意男女比例,足足相差一倍。咁調返轉諗… 女仔參加一個活動,又係考慮咩嘅呢?同學你問左一個好問題啦!

其實呢個先係重點中嘅重點,足以顛覆我前面講嘅所有野!想知道有客觀數據支持嘅女仔參加活動嘅諗法?就要密切留意我地下一篇文喇!

非常歡迎大家投稿啊!只要係關於活動同交友嘅文章都有可能會刊登出嚟同咁多位朋友分享。你又有咩心得?快啲話俾大家聽啦!另外如果想加入超過40個唔同嘅WhatsApp Groups結識志同道合嘅朋友,又或者想出席每月20幾個唔同嘅活動,就快啲下載我地嘅專用App,登記加入Nakama啦:https://nakama-group.com/nakama-app/

By Nakama管理員

Leave a Comment